Ұлы Отан соғысында Мәскеуді қорғап қалған кімдер?!

42

316- атқыштар дивизиясы 1941 жылдың жазында (маусым айы) Ұлы Отан соғысы басталып кеткен кезде Алматы қаласында жасақталды. Генерал И.В.Панфиловты сол кездегі Қазақстан Орталық Комитетінің бірінші хатшысы Жұмабай Шаяхметов Фрунзе қаласынан (қазіргі Бішкек) шақыртып алып, (Қырғызстанда гарнизон командирі болатын) Алматыда арнайы дивизия жасақтауға кеңес берді. Соғыс кезінде Қазақстанның әр түкпірінде  басқа да біраз дивизиялар құрылған болатын.  Алматы түбіндегі Талғарда дивизия құрамындағы әскерлер бірнеше ай бойы жаттығудан өтіп, осы жылдың 17 қыркүйегінде эшелонға тиеліп майданға аттанып кетті. Дивизия құрамының 70% пайыздан астамы  қазақтар, қалғандары – орыс, қырғыз,  ұйғыр, дүнген,  татар, тағы басқа ұлт өкілдерінен тұрды. 

316-атқыштар дивизиясы алдымен қоршаудағы Ленинград түбіне түсірілген еді. Бірақ, Иосиф Сталин дивизия­ны Мәскеу түбіне аударып, мар­шал К.Рокоссовскийдің қарамағындағы 16-шы армияға қосты. Жауды сай-саламен, сондай-ақ, орманмен келетін болар деген оймен, 16-шы ар­мия­ның барлық дивизиялары, бөлімдері, соғыс техникалары осы орман мен сайларға орналастырылған-ды.
Немістер Мәскеуге соғысты шынында да осы бағыттан бастаған еді. Жау Мәскеуге тура апа­ратын жазықта орналасқан Волоколамск ауданы және ондағы Дубосеково трассасына көп көңіл аудармаған болатын. Олар, орыстар әскерінің көбін сол жазық далаға орналастырған шығар деген пікірде жүрді. ­Волоколамск ауданына жаңадан келген алматылық 316- атқыштар дивизиясын Рокоссовский 45 шақырымдық (километр) ашық далаға орналастырды. Мәскеуге  ұмтылған жау, орман, өзен, сай-саласы мол бағыттан қатты қарсылық көріп өте алмаған соң (бұл араларда маршал Рокоссовскийдің дивизиялары мен соғыс техникалары орналасқан ) фашистер Волоколамск бағытына барлаушылар жіберіп, Мәскеуге таяу орналасқан ауданның және Дубосеково жолының ашық жатқанын білді, сонымен қатар, жақында ғана келіп орналасып жатқан бір дивизия ғана барын анықтады. Біраз мүмкіндікті жіберіп алған жау, өздерінің алданып қалғанын біліп қатты өкінді. «Әскерді баяғыдан осы бағытпен жібергенде, Мәскеудің табалдырығынан өтіп кетіп, орыс көшелерінде ойран салып жатар едік-ау» деп өкінішпен ойлады. Сөйтті де, Мәскеуді алуға арналған барлық күшті және техниканы Волоколамск бағытына дереу аударды. Сөйтіп, жалғыз дивизия орналасқан аумақты бірнеше сағатта тас-талқанын шығарып, тас жолмен танкілерді Мәскеуге кіргізіп жіберуге ұмтылды. Бірақ, көресіні осы жалғыз азиялық дивизиядан көрді. Бұл кезде орыстардың Сібірде жасақталып жатқан дивизияларынан әлі хабары жоқ болатын.
Жау бірден үш жаяу әскер дивизиясын, сонымен қатар, бір моторлы техникалары бар дивизия мен 700-ге тарта танкісі бар дивизияны тез арада Волоколамск ауданына аударды. Басқа дивизияларын да осы бағытқа тездетіп жинақтай бастады. Қазан айының ортасына таман Мәскеуді алуға арналған жаудың барлық күші осы азиялық жалғыз дивизияны неғұрлым тез таптап өте шығу үшін жабыла кетті. Генерал Панфилов штабта отыра алмай, полк, рота батереялардың арасында баладай жүгіріп жүрді. Жарылған снарядтар мен жаңбырдай жауған оққа да қарамады. Қасындағы көмекшілері, радистері бірінен соң бірі оққа ұшты.
Кейіннен қолға түскен жаудың бір офицерінің қалтасынан  ( аты- жөні Кромер)табылған хатта, үйіне былай деп  жазған екен: «2-қазан күні Мәскеуге кіреміз деп ойлап едік, соған дайындалып жүргенбіз, алдымыздағы өңкей азиялық елдің адамдарынан құралған дивизияны құртып жібере алмай тоқтап қалдық. Өздері қырылып жатса да шегінбейтін адамдар екен. Әскеріміздің жүрегі қайтып қалған секілді. Бірақ, фюрердің бұйрығын алдық. Осы маңайдағы  Мәскеуді алуға жинақталған 28 дивизияның барлығын осы бағытқа жіберуге бұйырған екен. Мүмкін, осы күшпен жарты күннің ішінде бұларды таптап өтерміз. Келесі хатты Мәскеуде жазармын» депті (Ф.Селиванов «Панфиловцы»).
Панфилов дивизиясындағы әрбір рота мен взводта танктерге гранат лақтырушылар тобы ұйымдастырылды. Бұған жүректі, күшті азаматтар іріктеліп алынды. Гранаттар мен жанғыш заттар соларға берілді. Майданда қиян-кескі соғыстар жүріп жатты. Мәселен, аға лейтенант Райкиннің окоптарына бірден 40 танк лап қойды. Оларға ілесе жаудың қалың жаяу әскерлері келеді. Жау танкілерінің бірі солдат Төлеқабылов (Алматы облысының тумасы)  жатқан окопқа таяп келді. Ол ұшып тұрып, граната лақтырды. Жарылған граната танкінің ішіне түсіп, гүрс еткен дауыс естілді. Міне, оған екінші танк таяп келіп қалды. Төлеқабылов шапшаң қыймылмен жандырғыш сұйық зат құйылған бөтелкені лақтырды, танк өртеніп кетті. Ержүрек ­жауынгерге қарай үшінші танк келе жатты, ол тағы да граната лақтырды. Бұл кезде  өзі де ауыр жараланған еді. Тағы бір танк қасына келіп қалды. Төлеқабылов лақтыруға шамасы келмей, гранатаны бауырына қыса ұстап, танкінің шынжыр табанының астына ­барып құлады.
Панфилов дивизиясындағы гранат лақты­ру­шылардың тобы негізінен қазақ жігіттерінен құралған болатын. Олар өздеріне берілген тапсырманы ерлікпен орындап шықты. Бірақ,  бірде-біреуі тірі қалмады.
Қайран азаматтарға Кеңес Одағының Батыры атағын ешкім ұсынған да, берген де жоқ.
316-атқыштар  дивизиясы,  Мәскеу түбіне Сібірден жасақталған дивизиялар келіп жеткенше, бір айдан аса уақыт  жаудың сұрапыл күшін  бір өзі ұстап тұрды. Кейіннен бұл дивизияға Гвардия атағы берілгенімен, Сібірден келген әскер санымен толықтырылса да, бұрынғы дивизиядағы қазақ жауынгерлерінің көпшілік бөлігі  қаза тапқан еді. Бұл кезде орыстың қаhарлы қысы да келіп жеткен болатын. Жау техникалары және әскерлері қатты аяздан шабуылға шыға алмай, техникасы қатып, әскерінің біраз бөлігі үсіп кеткен-ді.
Сонда, орыс Мәскеуі  кімнің арқасында аман қалды және оны қанын төгіп, қорғап қалған кімдер ?!

Бейсенғазы ҰЛЫҚБЕК,
Қазақстан Журналистер 
одағының мүшесі