Үкімет құрамына жастарды тартамыз. Бұл туралы бүгін Ақордада отандық және шетелдік БАҚ өкілдеріне сұхбат берген ҚР Президенті Қасым-Жомарт Тоқаев айтты
«Біздің заңнамамызға сәйкес Үкімет отставкаға кетпейді. Дегенмен, нақты-нақты кадрлық ауыс-түйіс болады. Бұған дейін атап өткенімдей, Үкіметке жаңа тұлғалар, оның ішінде жастар өкілі тартылады. Меніңше, барынша қабілетті кадрларды тарту қажет», – деді Мемлекет басшысы.
Осы орайда Қасым-Жомарт Тоқаев «Президенттік кадрлық резерв» дайындауға уәде бергенін еске салды. Оған еліміздің барлық өңірлерінен 300 адам кіретінін атап өтті. «Біз бұл тізімді жаңартып отырамыз. Бұл догма емес. Дегенмен, басты мақсат – жастарды мемлекетті басқаруға тарту»,- деді ҚР Президенті.
