Ұлттық банк алдағы үш жылда инфляция деңгейі қалай өзгеретінін айтты

Ұлттық банк төрағасының орынбасары Мәдина Әбілқасымованың сөзіне сенсек, инфляция деңгейін 2020-2021 жылдары – 4-6 пайыз, 2022 жылдан бастап 3-5 пайыз дәлізінде сақтау көзделіп отыр, деп хабарлайды ҚазАқпарат тілшісі.

«Ұлттық банктің ақша-несие саясатының негізгі мақсаты – баға тұрақтылығын қамтамасыз ету. Инфляция бойынша 2020-2021 жылдарға арналған мақсат 4-6 пайыздық, 2022 жылдан бастап 3-5 пайыздық дәлізде белгіленді. Ұлттық банктің базалық мөлшерлемесі ақша-несие саясатының негізгі құралы болып қалады. Ұлттық банк базалық мөлшерлеменің деңгейін елдегі қалыптасқан және күтілетін инфляцияның мөлшеріне қатысты, сондай-ақ сыртқы факторларды ескере отырып белгілейді. Бұл ретте оның деңгейі нақты көрсетуде 3-3,5 пайыздық деңгейде сақталады», – деді Мәдина Әбілқасымова Парламент Сенатының Қаржы және бюджет комитеті отырысындағы «2020-2022 жылдарға арналған республикалық бюджет туралы» заң жобасының таныстырылымында. Оның айтуынша, биыл қыркүйекте жылдық инфляция 5,3 пайызды құраған. Азық-түлік бағасының жылдық деңгейде 9,1 пайызға ұлғаюуы инфляцияға барынша себеп болып отыр. «Инфляцияның нысаналы дәліз шегінен шығу тәуекелдерін болдырмас үшін 9 қыркүйекте Ұлттық банк базалық мөлшерлемені 9,25 пайызға дейін көтерді. Ұлттық банктің бағалауынша, инфляция осы жылдың қорытындысы бойынша 5,7-5,8 пайыздық деңгейде қалыптасады. 2020 жылы 4-6 пайыздық нысаналы дәліз ішінде сақтала отырып, инфляция біршама төмендейді деп күтіледі», – деді Ұлттық банк төрағасының орынбасары.

inform.kz