«Алтын тұлпар» аламан бәйгесі өтеді

12 қазан күні Атырау облысы Махамбет ауданы Алмалы елдімекенінде «Алтын тұлпар» атты аламан бәйге өтеді, деп хабарлайды ҚазАқпарат тілшісі. ҚР Ұлттық спорт қауымдастығы хабарлағандай, аламан бәйге Қазақстан Республикасының Тұңғыш Президенті, Елбасы Н.Назарбаевтың «Рухани жаңғыру» бағдарламасы аясында «Нұр-Отан» партиясының қолдауымен, ҚР Ұлттық спорт қауымдастығы мен Атырау облыстық әкімдігінің бірлесе ұйымдастыруымен өтпек.

Айта кетейік, «Алтын тұлпар» бәйгесі 2014 жылдан бері қарай, төрт мәрте Нұр-Сұлтан қаласы маңында өтті. Қазақы қолтума жүйрік жылқылар тұқымының қалыптасуына ықпал жасау және ұзаққа шабатын бәйге аттарын баптайтын атбегілерді ынталандыру мақсатында қолға алынған бұл ат жарысы қазіргі кезде Қазақстанның ең үздік сәйгүліктері қатысатын, айтулы атбегілердің асыға күтетін мерекесіне айналды. «Алтын тұлпар» республикалық турнирінің бас бәйгесін 2014 жылы Қарағанды облысының жүйрігі «Бақторы», 2015 жылы Жамбыл облысының тұлпары «Cамал», 2016 жылы Жетісу өлкесінің жүйрігі «Жаннұр», 2017 жылы Жамбыл облысының тұлпары «Самал» екінші мәрте ұтты. Өткен жылы ұйымдастырушылар алқасы «Алтын тұлпар» бәйгесін елорда төңірегінде ғана емес, еліміздің басқа өңірлерінде де өткізген жөн деп шешкен болатын. Сондай-ақ, аталған жарысты жыл сайын емес, екі жылда бір рет өткізу туралы келісімге келген. Биылғы аламан бәйгенің ресми атауы – «Алтын тұлпар – Жайық жағасында» V республикалық турнирі. Қашықтығы – 51 шақырым. Бас бәйгесі – 10 миллион теңге. Жалпы жүлде қоры – 22 миллион теңге. Нақтылап айтар болсақ, алдыңғы келген тоғыз жүйрікке бәйге бар. Аламан жарысқа жүйрік жылқы тұқымдарының барлығы жіберіліп, еліміздің 14 облысы және Нұр-Сұлтан, Алматы, Шымкент қалаларының әрқайсысынан 5 сәйгүліктен қатыса алады. Өтінімдер 11-қазанға дейін қабылданады. Сондай-ақ, 11-12 қазанда Атырау қаласы күніне орай, Атырау облысы әкімдігінің бастамасымен, Атырау облысы дене шынықтыру және спорт басқармасының, облыстық «Ұлттық спорт түрлері» федерациясының ұйымдастыруымен, Махамбет ауданы Алмалы ауылында «Дарабоз-2019» халықаралық турнирі өтеді. Онда, көкпар, аударыспақ, қазақ күресі, теңге ілу, жамбы ату, аламан, топ және құнан бәйге, жорға жарысы, құмай тазы жарыстары сынды ұлттық спорт түрлерінен жарыстар өтеді. Бұл турнирге Қазақстан және шетел командалары қатысады. Жарыстың жүлде қоры – 32 180 000 теңге.

inform.kz