Тоқаев: Денсаулық сақтау саласына бюджеттен бір триллион теңгеден астам қаржы бөлінген

Қазақстан президенті Қасым-Жомарт Тоқаев жексенбі, 7 сәуірде Twitter-дегі парақшасында елдегі денсаулық сақтау саласына бір триллион теңгеден астам қаржы бөлінгенін хабарлады. Оның айтуынша, әлі күнге дейін аймақтарда қарапайым медициналық қызметке қол жеткізудің өзі қиын болып отыр.

Бүгін Дүниежүзілік денсаулық күні.Биыл бұл күн халықты жаппай денсаулық сақтау қызметімен қамту тақырыбына арналып отыр.Қазақстанда денсаулық сақтау саласына республикалық бюджеттен 1трлн 180 млрд теңге бөлінген.Көп шара атқарылып жатыр,оның ішінде,ТМККК аясындағы жұмыстар да бар.

Қазақстан билігінің дерегінше, 2018 жылы тоғыз айдың нәтижесі бойынша, бір дәрігерге жазылған адамдар саны орташа есеппен 1900-ден асқан. Республика бойынша денсаулық сақтау мекемелерін медициналық жабықтармен қамтамасыз ету деңгейі 2018 жылы 67,7 пайызды құраған.

Аймақтарда бюджет есебінен тегін таратылатын дәрі-дәрмек мөлшері қысқарған. Бұған дейін Азаттық сұрақтарына жауап берген Қазақстанның денсаулық сақтау министрі Елжан Біртанов препарат тапшылығының жыл сайын қайталанатынын айтқан еді.

– Фармацевтикалық компаниялар дәрі-дәрмектің бағасын көтереді де, біздің жоспарлаған ақшамыз жетпей қалады. Сол кезде науқастарды кейбір дәрі-дәрмекпен қамтамасыз ету зор проблемаға айналады. Бұл жыл сайын қайталанатын жағдай және тек Қазақстанда ғана емес, өзге мемлекеттерде де солай. Баға қымбаттаған соң өзімізге бөлінген қаржыны көбейтуге мүмкіндігіміз болмайды. Себебі, жылына екі рет қаралатын бюджетіміз алдын ала белгіленеді, – деді министр.

Біртанов елдегі кейбір фармацевтикалық компаниялардың шетелдік фармакологиялық компаниялармен тікелей келісім-шарт жасасып жатқанын да айтып өткен.