Халықаралық Qazaq kuresi федерациясына 2 жыл толды

Қазақстанда және шет мемлекеттерде ұлттық спорт – қазақ күресін танытып жүрген Халықаралық Qazaq kuresi федерациясына екі жыл толды. 

Қазақ күресінің даму тарихы тереңде жатыр. Той-домалақ, жиын-мерке, түрлі басқосулар палуандардың белдесуінсіз өткен емес. Қазіргі таңда елімізде жекпе-жек өнерін әлемдік бәсекеге лайықты спорт деңгейіне шығару маңызды міндеттердің біріне айналып отыр. Осы мақсатта 2017 жылы Астана өткен жалпы құрылтайдың кезекті отырысында Халықаралық Qazaq kuresi  федерациясын құру туралы шешім қабылданған болатын.
Бүгінде федерацияны мемлекет қайраткері, Қазақстан Республикасының Энергетика министрі Қанат Бозымбаев басқарады. Қазақ спортының аңызы, олимпиада чемпионы Жақсылық Үшкемпіров, олимпиада ойындарының қола және күміс жүлдегері, танымал палуан Дәулет Тұрлыханов сынды азаматтар федерацияның вице-президенттері ретінде тағайындылды.

Халықаралық қазақ күресі федерациясы «халықаралық» мәртебесімен ғана шектеліп қалмайды. Федерация қазақ күресін әлемдік деңгейдегі турнирлерді ұйымдастырушы ретінде еліміздегі бірегей қоғамдық ұйым болып отыр. Сонымен қатар, Халықаралық қазақ күресі федерациясы – ұлттық спорт түрін әлемдік деңгейде дамытып, халықаралық серіктестер мен спортшылардың басын біріктіріп жүрген бірлестік.

Халықаралық Федерацияның құрылғанына аз болса да, осы уақыт аралығында ауқымды шаралар мен нәтижелі жұмыстар атқарылды. Федерация құрамына Еуропа мен Азия елдерінің 28 ұлттық федерациясы кіреді. Есесіне әлемде ұлттық спортымызға қызығушылық танытқандар саны күн санап артуда.

Федерация жыл сайын халықаралық турнирлер мен іс-шаралар өткізуді дәстүрге айналдырған. Федерация құрылған 2 жыл ішінде қазақ күресінен әлем чемпионаты – 2017 (Астана, Қазақстан), 2018 жылы жаттықтырушылар мен төрешілерге арналған халықаралық семинар (Тбилиси, Грузия), 2018 жылы Қазақ күресінен I Еуропа чемпионаты (Батуми, Грузия), 2018 жылы оқу-жаттығу жиыны (Алматы, Қазақстан), 2018 жылы I Азия чемпионаты (Астана, Қазақстан),  Федерация қолдауымен «Әлем барысы» турнирі өткізілді. Сондай-ақ, 2018 жылы 3 ұлттық чемпионат өткізілсе, биыл ұлттық чемпионаттар саны 10-ға жетті.

2019 жылдың маусым айында Федерация Польшадағы Вроцлав қаласында II Еуропа чемпионатын өткізеді. Бұл чемпионатқа Еуропаның 23 елінен 100 палуан жиналады деп күтіліп отыр. Халықаралық Qazaq kuresi федерациясы шетелдік бапкерлерге арналған оқу-жаттығу семинарлары мен палуандардың шығындарын өз мойнына алады.

Әлбетте, қарқынды қолдаудың арқасында ұлттық спортымыз бүгінде әлемге кең насихатталып, үлкен танымалдылыққа ие болып отыр. Грузия, Қытай, Еуроодақ елдері, Иран және т.б. елдерінің азаматтары қазақ күресімен айналыса бастады.

Халықаралық қазақ күресі федерациясы жыл соңына дейін Еуропа чемпионатын, Әлем чемпионатын, Әлем кубогын және тағы басқа көптеген шаралар өткізуді жоспарлап отыр.

BAQ.KZ
Фото: ашық дереккөз